DIGNIFICAR LA LENGUA ARAGONESA

Replegamos asti ista informazion ta espardir-la en ista bitacora:

Estimau/da amigo/a,

Cuan pensemos en fer bella cosa ta dignificar a nuestra faina personal por tresmitir l’aragonés a os nuestros fillos, surtió a idea de l’Asoziazión de Mais y Pais d’Alumnos.

En primeras yera una inquietut de chen que ya partizipamos en o mobimiento lingüistico, pero que queremos dar a posibilidat de partizipar a más chen: no organizada, que simpatiza u no puede estar sozia actiba. Porque somos muita más chen, no sólo os parladors asoziaus, os que tenemos fillos escolarizaus, que paten a contina luita animica entre o que a escuela diz, y o que lis dezimos nusatros. En iste momento de nuebas posibilidaz ta la luenga, i querébanos alportar atro matiz. Tamién os fillos nuestros son parte d’o debate, socheto de dreitos sozials que no debemos olbidar. Atro grano en l’arena con a que somos debantando a casa común de l’aragonés.

Sin intenzión de fer garra asoziazión a l’uso, con nezesidat d’estar-ie, d’acudir ta garra siede, etc, l’unico que queremos ye achuntar a la chen de cualsiquier asoziazión lingüistica, entidat sozial afín a l’aragonés, amigos u conoxenzias nuestras, que quieran partizipar en iniziatibas puntuals ta fer bisible que tamién i somos como pais y mais, no sólo que como parladors.

Como ye imposible beyer-nos, chen de puestos tan alexaus, tan radius de tiempo muitas begadas, nos aconformábanos con fer de conchunta:

· aczions simbolicas, simplas,

· que nos bisibilizen, como pais

· que nos bisibilizen, como luenga.

Ista noteta quiere pedir a buestra colaborazión. Porque nos ye costando mober-nos-ne más d’o que pareix. Siempre pensamos que con fer cosas en l’asoziazión nuestra u simpatizar ya ye pro, y muitas begadas olbidamos l’apoyo a iniziatibas puntuals que i surten (mosica, libros, adesions, etc). A “Mais y pais por l’aragonés” li ye pasando ixo. Que tien más simpatías que partizipazión.

Asinas que, aprofitamos ta pedir-te a tuya implicazión, contrantes, en beluna d’istas iniziatibas. Todas son socherenzias de chen particlar. Tu puez fer-ne una, y la ixamenaremos por o listau de chen que i partizipamos:

· Demanda por escrito a o gubierno aragonés ta que den clases d’aragonés en a escuela a os fillos tuyos. N’esiste un modelo, que puez acotraziar u copiar.

· Demanda por escrito a o gubierno aragonés ta que t’informe de zentros en o tuyo monezipio an podrás matricular a o tuyo fillo (de 0 a 3 años) en clases d’aragonés. Opzión ta chen con fillos encara no escolarizaus.

· Informazión sobre libros de texto con referenzias negatibas a l’aragonés. Se´n informará a o Chustizia d’Aragón, tramitando-lo como queixa.

· Ta fer publica ista iniziatiba, se presentará dinantes de cabo de setiembre a queixa en o Chustizia (carrera Chuan d’Aragón, Zaragoza) por os libros de texto. En ixa presentazión publica se dará a conoixer a posibilidat de pedir por escrito as clases y cómo contautar con l’asoziazión. Ta ixe día ye menister que se i beiga chen, que o gubierno sienta que l’aragonés tien caras y sentimientos con nombres y apellius. Mete-te en contauto ta partizipar-ie u aduyar-ie.

Te rogamos que no dixes pasar ista oportunidat de fer un poquico más de zeprén por a luenga. Cal sacar-nos de denzima o peso d’o silenzio, y una miajica de rasmia tuya i ferá buena onra.

Chabier Gimeno, Pablo León y Eva Hernández

en representazión de Mais y pais por l’aragonés.
[e-mail]



Escribenos a:

[e-mail]

Mosica y Parolas

Apartado de correos 8168

Zaragoza 50080


Visita:
http://www.myspace.com/mosicayparolas

musica

cultura

Technorati Profile

medios

musica

folk

world music