10 ENOS OMENACHES ARREDOL

Ista ye la imbitazion que nos han nimbiado dende presidenzia de Fablans de l'Aragones - Zaragoza.

10 enos. Omenaches Arredol de a Luenga Aragonesa, 2006.

Quiestas ligalleras, quiestos ligallers:

O benién sabado diya 16 d'abiento en Lo Pallar d’Agustín, Echo, a las 18: 30 oras, Ligallo de Fablans de l'Aragonés zelebrazá os 10enos. Omenaches Arredol de la Luenga Aragonesa, adedicatos á presonas e istituzions destacatas en a esfensa, espardidura u desembolique de a luenga aragonesa.
Ista añada Ligallo de Fablans de L’Aragonés s’alchuntato á la initiatiba de o Conzello de Val d’Echo y l’Asoziazión Cultural Bisas de lo Bubordán, que presentan o zaguer libro de Rosario Ustáriz Borra, Miquetas de l’alma.

Rosario Ustáriz Borra ye ya una escritora veterana que escribe en cheso, modalidá de l’alragonés fablato en la bal d’Echo. Ye en ista, a suya luenga materna, en a que esprisa os suyos sentimientos umanos y relichiosos, con un buen lumero de emotibas poesías publicatas en rebistas y libros.

A calidá de os suyos treballos ya li ha balido barios premios, dentre os que en destaca o Onso de Oro en a primera y segunda edizión de o Zertamen Literario “Val d’Echo” y recullitas en as correspondiens publicazions (“Remerando a Pedro que s’en fue chugando”, 1982; “Navidá”, 1983). En 1994 torna á ganar o Onso de Oro en poesía chesa con a obra “A una Rosa mía”.
Por a resta, o suyo compromís con a cultura chesa y as suyas cualidaz umanas fan de Rosario Ustáriz una muller muito quiesta en toda la redotata, habiendo estato cantidata a lo premio Jacetanos de año bella bez.

Por tot isto, Ligallo de Fablans de L’Aragonés s’alchunta á ista presentazión, que contará con a presenzia de José María Enguita, profesor de a Unibersidá de Zaragoza y reputato lingüista, asinas como de Pepe Lera, inbestigador, escritor y miembro de o Grupo Folclorico Val d’Echo.

Soz toz/das imbitatos, tos asperamos. Un fortal abrazo.

Feliciano Martínez Tur.
Presidén de Fablans-Zaragoza.

L'autora chesa Rosario Ustariz presenta ista tarde-nuei o suyo nuebo libro "Miquetas de l'alma" en Lo Pallar d'Agustín d'Echo grazias a l'Ayuntamiento d'Echo y l'asoziazión Bisas de lo Subordán.

Podez leyer un polido poema suyo premio Onso de Oro de poseía chesa e 1994 asti:

A UNA ROSA MÍA Rosario Ustáriz

Echo, agosto de 1994 (Premio Onso de Oro en poesía chesa)

He una rosa, yo, en lo güerto, que se parez a una flama
que lo sol de meyodía encendese'n la rosera;
si la bisa la bandía, ye igual que una flamarada
y los capullez son plumas que brincan de ixa foguera.

Como ye de vida curta, la cudio con muito esmero;
querería que durase... hasta que yo me morise...
y al irme'n, ya, d'esti mundo, la mía rosa de fuego
amonico s'apagase, s'acochase y machurrise.

Las polidas mariposas lo suyo néutar no tastan;
los moscallóns, morgoniando, no s'atriven a posarse'n;
yo prexino si habrán miedo de dixarli bella taca
y alcaso, las mariposas, hayan miedo de cremarse'n.

Ye no vivir como vivo por esta rosa de flama:
me s'antulla que la furtan, la maltratan y la creban;
clavada i-só en la finestra, que hasta suenio que me clama,
pero muda ye'n lo ramo, más polida que una estrela.

Hoy lo cielo yera escuro, con nublos de muitas trazas:
meyo negros, meyo grisos y, blancos, con muitos brilos;
como i-plegan de Forquiello, siguro trayen tronada
y los blancos, que relucen, serán preñes de granizo.

Corro ascape ta lo gúerto, entre que un trueno retembla...
¿Qué faré yo con la rosa?... ¡Qué faré, Dios de lo Cielo!...
Si la plevia caye, firme, las follas irán ta tierra
y si escarga lo granizo, la estroxina sin remeyo.

La pillo con las dos manos, como a lo fiIlo la madri
li acaricia la careta, y, con ixe mismo mimo
li digo con voz muy queda (entre que vo un beso a darli)
y me trovo, allora, engüelta en olós cuasi divinos:
No hayas miedo, rosa mía, si te levo de la talla
un aposento te guardo millor que lo de lo güerto,
a cobexo de las plevias, de lo sol que asti t'abrasa
u de babas de bel cuco que t'enchunque sin d'antuello.

En la finestra más clara que bi-haya en casa nuestra,
ixa que da ta Escagúés, Remílez y Romaciete,
en lo vaso más veroyo y con l'agua bien fresqueta,
tú i-verás clariar lo día y tamién si s'escurece.

Y lo cruzar de los nublos como barcos por lo Cielo...
Y sentirás paxaricos en la nuey y en las albadas...
Y lo volar de las follas, devantadas por lo cierzo
t'aganará, porque allora, serás libre de voladas.

De pronto, sinto un punchazo que me traspasa lo dedo...
A lo fuir de la mano, s'esgarra la sangonera
y de la guilla, ya fonda, s'escurre sin ferli duelo
la sangre roya y calién que motía la rosera.

Me concaro con la rosa mirándola fito a fito
y li do la mía quexa con más pena que carraña:
-¿Asinas pagas, infame, lo cudiáu, esvelo, aimo,
que yo he habíu con tú dende que ibi-és en la mata?

La rosa no tarte branca y cabecía con l'aire...
Un rayet de sol se'n baxa y la fa más encendida...
Li do otro beso... ¿Qué se sabe de punchas ni disaires
si no sabe que, de todas, ella ye la más polida?